Manchester United po vazhdon formën e jashtëzakonshme që kur Michael Carrick mori drejtimin e klubit. ‘Djajtë e Kuq’ triumfuan sot me rezultat 2-1 ndaj Crystal Palace me rikthim në kuadër të xhiros së 28-të në Premier League.

Ishin mysafirët që shënuan të parët në minutën e katërt me Lacroix, shkruan Arbresh.info.

Me këtë rezultat u mbyll edhe pjesa e parë. Autori i golit të Palace u shndërrua në fytyrë tragjike në minutën e 56-të kur u ndëshkua me karton të kuq dhe shkaktoi penallti.

I saktë nga një 11-metra si zakonisht ishte Bruno Fernandes i cili barazoi rezultatin.

Tetë minuta më vonë, Fernandes asistoi për Benjamin Seskon i cili realizoi për 2-1. Deri në fund nuk pati gola tjerë dhe United arkëtoi tre pikët e reja.

Me këtë fitore, Manchester United u ngrit në pozitën e tretë me 51 pikë teksa Crystal Palace bie në pozitën e 14-të me 35 sosh.

Ndeshjen e radhës, United e luan ndaj Newcastle kurse Palace përballet me Tottenhamin./Arbresh.info